نورة فتاة عمرها عشرين مالها في هالدنيا بعد الله الا امها واخوها
حالتهم الماديه كانت دااااجة وخصوصا ان الولد مامعه الا ثاني متوسط ومن ثلاث سنوات وهو يدور وظيفه ولا لقى ونورة
طالبه في ثاني جامعة وكان طموحها تتخرج وتتوظف عشان تصرف على هالثور وامها المسيكينه
طبعا ماكان لهم الا راتب ابوهم اللي توفى والراتب تقريبا ثلاث الف ريال <<< تحسون ان السالفه صدق
البنت تبي تكشخ في الجامعه مثلها مثل باقي البنات لكن من وين ياحسره ولاتحوم كبدها ويجيها حموضه من القهر الا
اخر السنة اذا قاموا هالبنات يشخصون .... اللي تبي تسافر لبريطانيا واللي اسبانيا واللي بلبنان
وهالمسيكينه مغير تاكل في نفسها من القهر
انتهت الامتحانات وكل اللي تعرفهم من البنات ومعها بالمسينجر مشخصين بتوبيكاتهم ... اللي كاتبه اشوفكم على خير
والوعد اسبانيا واللي كاتبه واخيرا اقتنعوا اهلي مانروح لفرنسا ونروح لايطاليا <<<< ولو باين انها نصابه
الا هالمسيكينه نوره كاتبه في التوبيك حقها ( اذا دعتك قدرتك على ظلم الناس فتذكر قدرة الله عليك ) <<< بلا والله من
القهر المسيكينه
وبحركة لااراديه مصعت فيش الجهاز وراحت لامها ودموعها سابقتها ...
يمة لازم نسافر في هالصيف مثل العالم والناس ( وجه حاطن يديه على خصره ويهز رجل بأطراف اصابع رجله )
الأم : بااااااااااااس ... ولا يهمتس وانا امتس الاسبوع الجاي نروح لمزرعة خالتس منيرة اللي بسدير ولايضيق صديرتس
ياخلفهم ( وجه فيه حنان الامومه )
اي سدير يمه واي مزرعة اقووووولك نبي نسافر مثل العالم وتقولين سدير !!!!!! يايمه اقل شي اقل شي نروح ( وهنا
بغت تقول لندن بس خافت تنشل امها وصرفتها بجده )
خلاص وانا امتس ذكريني اكلم المحامي حق العائلة اقوله بع اسهمنا اللي بحدى هالشركات الامريكيه عشان نسافر
فيهن وتوسعين صدرتس انتي وخفيف الظل اخوتس
تنكتين يمه ؟؟؟ يوووووووووه شكلي ابنتحر من القهر
اصبري وانا امتس لاتـنـتحرين الحين الله يعافيتس ترا ثيابتس بتطلع من الخياط يوم الخميس ... جربيهن قبل <<< الله العالم
ان الام مقلعة و بقوة بعد ^_*
رجعت نورة لغرفتها وفتحت جهاز الكمبيوتر وسوت تسجيل للمسينجر واول مافتحت الا وتجيها طلب اضافه وكان النك
نيم للي طالب الاضافه ( كاااااااش وحلوووو )
ماصدقت خبر وعلى طول وافقت على الاضافه وفعلا كان اون لاين ( كاش وحلو )
شوي الا بوكس جديد انفتح وكان ( كااااااش وحلوووو) هاي مساء الخير ياعسل
ردت نوره عليه هااااااي اهلين .... إنتا مين وحطت وجه مستحي
انا اللي عمري كله جراح انا اللي حبيتك من ايميلك انا من باع في الهوى عمره لك ياحياتي ( قلب )
نورة بعد ان جاها حالة خققان : واااااااااو كلامك مره رووووووعه ويجنن باين عليك شاعر ( وجه مستحي )
انا شاعر ان قلبي بدأ يخفق ومانقصه الا زبيده تجي تغني على خفقاته وانتي ترقصين عليها ياحياتي ( قلب + ورده)
طيب انتا كيف حبيتني وانتا ماشفتني ؟؟
انا ياحياتي قلبي وقدري هم اللي دلوني عليك ... دلوني لعيونك اللي سحرتني وابتسامتك اللي أسرتني (قلب+ورده+بوسه ) <<< خربها هالمره
ومرت الايام وكانت نورة تعيش قصة حب مع هالكاااااش اللي عرفت ان اسمه سلطان وصارت تقضي اغلب وقتها بالنت
وخصوصا ان امها لاهية مع جيرانها واخوها دايم برا البيت
تطورت العلاقة بينهم ووصلت لمرحلة متقدمة من الحب لدرجة انهم قرروا يتقابلون عشان يشوف كل واحد منهم الشخص
اللي حبه ويعبر له عن مدى شوقه وحبه له على الطبيعه
ولكن نورة كانت متخوفه من اللقاء بينما سلطان كان ناشبن لها يبي يقابلها .. لا ويقولها بعد تطلعين معي ونروح
لمزرعتنا عشان ناخذ راحتنا اكثر في جو رومانسي طبيعي خالي من الكربون <<< يسمع بالاغراء
مرت سنة على علاقتهم اللي كل يوم تقوا واللي برضه كل يوم سلطان ينشب لنورة تقابله والبنت مازالت خايفه وخصوصا
يوم قال مزرعة
طبعا سلطان مسوي كااااش وكل يوم يجيب لهالمسيكينه سالفه مره الوالد اشترا لي شاليه على ضفاف نهر التايمز ومرة
يقول ياربييييييه تصدقين الـ Bmw حقتي بنشرت ورجعت للبيت وخليتها وتصدقين نسيت وين انا حاطها فيه .. عاد يالله
الله يوفقه اللي بيحصلها وياخذها
وهالمسيكينه كل ماسمعت هالكلام قوطرت سعابيلها وطقت الهواجيس وتخيلت شكلها وهي لابسة فستان الزواج
وسلطان ماسك يدها وبيدها الثانية تذاكر سفر لدبي <<<< الضعيفه حتى طموحها مايبعد
وفي لحظة كان الشيطان متكي وحاط رجل على رجل جنب نورة ^_^فتحت المسينجر ولقت سلطان اون لاين وعلى طول
باغتته بسؤال مفاجئ ::
سلطان ... تحبني ؟
امووووووت فيك ياريم <<<< لاعبتن عليه بالاسم ^_*
الله لايوفقك وجعلها بذمتك ان كانك تلعب علي <<< من الحماس نست البرستيج
ياحياتي انتي صدقيني لو الوالد مو بفرنسا الحين يخلص صفقة ترميم برج ايفل والله ان تلقينا العصر جايين نخطبك
حبيبي سلطان ابي اشوووووووفك اليوم بلييييييز <<< في اللحظه هذي ابليس يدق اصبع من الوناسة ^_*
واخيرا ياحياتي وافقتي تشوفين اللي تعذب بحبك وذاق مرارة الشوق ولوعة الانتظار ( وجه واحد نصاب )
اوكي ياحبيبي انا ابطلع اليوم للفيصليه انا والبنات وابصرفهم واطلع معاك لكن مااقدر اتأخر اكثر من ساعتين بليز
ولايهمك ياحياتي لكن فيه مشكله ... تعرفين انتي الفيصليه هيئة ومشاكل وانا خايف عليك وطبعا لو جيت بالفياقرا والا
بالـ Bmw والا بالبورش اكيد راح نلفت الانتباه ويمكن يمسكوننا الهيئة وانا خايف عليك ياحياتي
اي والله صادق ياعمري ... كل شي الا الهيئه عاد .... طيب والحل ياحبيبي ؟
الحل ياقلبي مالي الا اني اجيك بالونيت حق سواق سواقنا .. انا اعرف انه مو من مستواك لكن ياحياتي عشان نبعد
الشبهه عني وعنك ياقلبي ...هاه وش رايك ؟؟
نوره بعد ماهوجست شوي وقالت في بالها ونيت ونيت وش ورانا والبي ام والفياقرا لاحقتن عليها اذا اعرست عليه ....
اوكي حبيبي اهم شي اني اكون معاك حتى لو تجيني بسيكل
واتفقوا على موعد اللقاء وكانت وسيلة التعرف ان نورها بتمسك معها كيس احمر مخطط بأسود <<< تراها مصرفته
وقايله مااقدر اكلمك بالجوال ياللي بتدققون
وطمرت نورة تتروش وتشخص لعريس المستقبل ^_^ وكان شعورها مخلوط بين الوناسة والنفاضة
وقبل الموعد المحدد قالت نورة لامها ابروح لندى بنت جيراننا ووافقت امها على مضض <<< ادري مالها سنع
وركبت نورة الليموزين وتوجهت للفيصليه وارتزت عند الباب بكيستها الحمرا
وماهي الا لحظات الا والونيت اللي يمر عندها وملع اغنية نبيل شعيل ليه ياغرام
وضرب لها بوري وعلى طول جته نوره ومن الخوف معاد تشوف الا باب الونيت وتفتحه وتركب وكانت منزله راسها من
الحيا
هلا والله بحبيبتي ريم هلا بكل الحب هلا بروحي ( وجه ناوي له نيه )
وبأستحياء ممزوج بشوي اغراء التفت نورة عليه ويوم شافته شهقت ذيك الشهقه محمــــــ.....
مايستفاد من هالموضوع :
انتبه لاتضيف احد بالمسينجر الا انت شايف بطاقة الاحوال ويجيب لك اثنيين شهود واثنيين يزكون الشهود وورقة من العمده
هههههههههههههههههههههههههههههه
التسجيل السريع إلى المنتدى
07-24-2008, 12:33 AM
وهقه
رد: وهقه
الأعضاء الذين قرأو الموضوع :- 5
العرض العادي
