صعب لا منّك فشلت .. وصعـب لا منّـك لقيـت
إن من يكره نجاحك .. يدري أنـك مـا نجحـت

أمس ضقت .. ورحت أقلّب ذكرياتي .. وانتهيـت
عند صورة طفل صوته مثل صوتـي لا إنجرحـت

وش مثل ؟ لا والله إلا هـذا أنـا يـوم ابتديـت
انطق حـروف تلعثـم فـي لسانـي لا انمدحـت

هذا أنا يوم الحيـاة فـنظرتـي عشريـن بيـت
ومسجدين ومدرسة من طين كم فيهـا اصطبحـت

هذا أنا .. وأصبحت أتمتم: ( هذا أنا ) حتى بغيت
اختنق.. بس القدر عيّا على موتـي .. وطحـت

وصاح صوت الطفل فيني : أنت من وين ارتميت
قلت: أنا المستقبل اللي فيه كـم همـت وطمحـت

أمس كنت أبيك تكبـر .. بـس والله لـو دريـت
إني اللي عشت لجله.. مـت عنـدك واسترحـت

لو دريت إن الزمـان يجـر رجلـي مـا عديـت
ولو دريت إن البحور بـلا موانـي مـا سبحـت

كان دربك لي طويل .. وكل مـا شفتـك هويـت
قلت لك كبـوة جـواد ومـا كبيـت إلا وجمحـت

ليه تسمعنـي وتمشـي .. آه ليتـك مـا مشيـت
وآه ليتك مـن كثـر عثـرات الأيـام انتصحـت

ضاعت أحلامي وضل الحـزن فينـي واهتديـت
للطريـق اللـي يودينـي علـى دمعـي ورحـت

يا الحزن ليتـك مثـل دمعـي وتنـزل لا رقيـت
بس أعرفك لو مسحت الدمع تبقى مـا انمسحـت

كان حلمي فـي وجـود إنسـان يبكـي لا بكيـت
وصار حلمي في وجود إنسـان يفـرح لا فرحـت

كنت أشوف الناس مثلي كل مـا جعـت وظميـت
ما دريت إن الأوادم نـاس فـوق ونـاس تحـت

آه يأول ذكرياتي .. خذنـي افـحضنـك نسيـت
لا أسألك عن وجه أبوي اللي معه يامـا سرحـت

خذني افـحضنك أبغفى .. يا آه مبطي ما غفيـت
وإن لمحت دموع عيني .. سو نفسك مـا لمحـت

خذني افـحضنك وبعثر في جروحي .. وإن قضيت
هز لي كتفي وقلي : عيـب تبكـي لـو سمحـت

اضحك .. وعلّم زماني من أنا .. ومن وين جيت
طق باب الحـزن وأصـرخ فـيّ لامنّـي فتحـت

وضمني يمّك ... وكمّل ضحكتـك لا مـن بكيـت
ودي اذكر كيف كانت ضحكتي .. لا مـن فرحـت